Kalte Sonne vén de publicar o segundo videoclip de presentación do seu novo álbum Laniakea Communique, correspodente ao cuarto tema do mesmo, «Twory-F». No mes de marzo, xunto co lanzamento do disco, presentaban o vídeo de «Anarres», tema no que o grupo conta coa colaboración de Abraham Cupeiro. Nesta ocasión trátase do corte máis longo do traballo, un tema de 18 minutos conceptualmente ligado, sinalan dende a banda, «ós intrincados labirintos psicolóxicos» da célebre novela do escritor polaco Stanislaw Lem Solaris. Esta obra é ben coñecida tamén pola adaptación cinematográfica da mesma levada a cabo polo soviético Andrei Tarkovsky en 1972.
A canción «camiña entre ambientes post-rockeiros e pasaxes de riffs con sabor metálico», afirman dende Kalte Sonne. Precisamente, o trío lucense é coñecido polo seu estilo post metal, ao que incorporan influencias doutros estilos como pode ser o post-black. O videoclip, que toma como base unha actuación da banda nas festas patronais da súa cidade, Lugo, xa se pode ver na canle de Youtube do grupo.
Laniakea Communique foi gravado por Iván Ferro nos seus estudios Kollapse, tamén en Lugo. É o primeiro traballo lanzado pola banda dende 2019, e o primeiro tamén dende o seu regreso aos escenarios no pasado ano 2023. O álbum foi lanzado o pasado día 1 de marzo, e toma o seu nome do termo hawaiano laniakea; significa «ceos inconmesurables» e é como se denomina ó supercúmulo de galaxias no que se atopa a Vía Láctea.