A nova banda Acouga, de Pazos de Borbén, acaba de estrear o seu primeiro sinxelo e videoclip, «Novo paradigma». Este tema foi gravado en Cimática Studio con Mahi Ferradás de Broa, e conta cun vídeo animado realizado por Kike Chouza con ilustracións de Anxo Pérez Peixoto. Xa podedes velo na súa canle de Youtube e ao final desta mesma noticia!

Acouga é un cuarteto que se comezou xestar en 2019, e se definen como post-bravú, como o álbum de Machina de 2009 con ese nome. Algúns dos seus membros fan parte tamén de bandas como Sete Cuncas ou Argholletas.

Neste primeiro sinxelo podemos escoitar un rock alternativo potente á vez que melódico, que logo incorpora elementos do hardcore e o metalcore. Todo isto, por suposto, en galego. O vocalista principal da banda, o xornalista Gabri Fuentes, mestura as voces limpas cos berros máis hardcoretas, mentres os riffs de Carlos de Castro e Luís González e os ritmos de David Martínez oscilan tamén entre as partes suaves e as máis potentes, creando uns contrastes que lembran a outros grandes grupos de rock e metal alternativo galegos, como pode ser o caso de Nao ou os xa mencionados Machina e Broa. De feito, membros de Acouga colaboraron con estes últimos en directo durante a xira de presentación do álbum Cucú dos cercedenses.

Con este primeiro tema, non cabe dúbida que os de Pazos de Borbén comezan pisando forte. Estamos atentos aos seus seguintes pasos!