O WOS Festival volve traer a Compostela a música de vangarda

Revivindo a cultura club, o festival volve triunfante ao seu formato habitual, celebrándose en varios espazos de gran valor cultural e patrimonial da cidade de Compostela. WOS Festival posicionará Galicia de novo no universo da creación contemporánea e a música de vangarda. Entre o 8 e 11 de setembro, a cidade albergará propostas en torno «ao risco e a exploración», co obxectivo de ofrecer unha alternativa cultural e artística na que descubrir e desfrutar de experiencias únicas, no marco incomparable do casco urbano e histórico da cidade.

Coa música como motor principal, pero cunha clara vocación multidisciplinar, o evento regresa nesta edición ao seu formato habitual tras ter realizado unha edición reducida o ano pasado. Ao longo das próximas semanas desvelarase o resto da programación de música, así como o resto de programas de cinema, instalacións, obradoiros e pensamento e debate.

Nesta VI edición o festival presentará as estreas no Estado de concertos audiovisuais protagonizados por algúns dos artistas que actualmente están marcando o ritmo da música contemporánea actual. Por unha banda, Caterina Barbieri, música, compositora e produtora italiana cuxa traxectoria a converteu nunha dos referentes do post-minimalismo actual, presentará en España o espectáculo audiovisual que acompaña o seu novo álbum, Spirit Exit (light-years), xunto aos artistas visuais Marcel Weber (MFO) e Ruben Spini. O disco foi lanzado este mes de xullo.

Por outro, o «alquimista sonoro» francés Aho Ssan e o artista multidisciplinar keniata KMRU, dous dos autores de varios dos álbums de electrónica máis importantes de 2020, únense agora para presentar Limen (Subtext): un espectáculo audiovisual intenso, potente e emocional cheo de dualidades conxugando os perfís opostos de ambos artistas.

Entre os concertos que poderán verse por primeira vez no Estado no marco desta edición, destacan: a presenza do estadounidense Brian Leeds, máis coñecido como Huerco S., quen na actualidade está traballando no concerto de presentación do seu aclamado novo álbum Plonk (Incienso), tras seis anos de parón. O seu anterior álbum, For Those of You Who Have Never (And Also Those Who Have) (Proibito, 2016), foi escollido pola revista Pitchfork como un dos 50 mellores álbums de ambient da historia; Blackhaine, coñecido internacionalmente non só pola súa música, senón tamén como coreógrafo das listening party dos dous últimos álbums de Kanye West. Promete ser un dos puntos álxidos do festival coa presentación do seu último traballo, Armour II, unha obra de hip hop experimental chea de nihilismo, agresividade, vulnerabilidade e conciencia social, en cuxa presentación en directo desprega a súa paixón pola danza; e ademais o proxecto de hip hop experimental dos estadounidenses Poozy e False Prpht, Prison Religion, que presentarán o seu novo álbum, Had Industrial B.O.P. (UIQ), e contaxiarán ao público do caos que habita a súa música co seu explosivo directo.

O programa musical contará tamén coa presenza de grandes artistas dedicados á experimentación co son, os instrumentos e as emocións. Pan·American virá presentar, por primeira vez por aquí, o seu recén publicado The Patience Fader (Kranky), onde volve demostrar mediante guitarras que o ambient é un estilo musical con marxe de exploración, levando atmosfera e estados de ánimo lonxe dos elementos clásicos do xénero. A danesa Sofie Birch, artista multidisciplinar e unha das grandes revelacións da música ambient e a exploración sonora actual, presentará Holotropica, o seu gran novo álbum. Estará acompañada da saxofonista e compositora Nana Pi, un dos grandes nomes da escena de jazz experimental. Tamén o acordeonista polaco Zbigniew Chojnacki, presentará no marco do festival o seu innovador concerto Accordion/Live Electronics, completamente diferente en cada sesión e co instrumento como única constante.

Completan o primeiro anuncio de artistas a produtora e dj holandesa upsammy, unha das caras máis recoñecidas do clubbing europeo polo seu talento como creadora e o seu exitoso paso por De School en Ámsterdam. Con ela estarán varios DJs, promotores e produtores galegos novos: Alicia Carrera, radicada entre Barcelona e Berlín, e cunha ampla experiencia como dj, label manager e promotora no circuíto internacional, e Yugen Kala, que á súa curta idade xa foron programados en festivais como Sónar e Mutek.

Comeza así a conta atrás para a cita anual da produtora compostelá Work On Sunday, que se celebrará entre o xoves 8 e o domingo 11 de setembro e que conta co apoio de SON Estrella Galicia vinculando outra vez o seu nome ao do festival como patrocinador principal e co apoio institucional do Concello de Santiago de Compostela, a Deputación Provincial de A Coruña, a Xunta de Galicia a través de Xacobeo 21-22 e AGADIC, e outras institucións e axentes culturais que operan na cidade. As entradas para esta edición xa están á venda e poden adquirirse a través de wosfestival.es.