A banda de punk rock coruñesa Crise vén de lanzar un novo videoclip, correspondente ao seu tema «Boca abaixo». Este tema serve como adianto do seu próximo EP, que será editado axiña, en formato vinilo, polo selo estatal Tough Ain’t Enough (TAE) Records. O tema foi gravado no estudio LCR da Coruña.

Crise naceu a finais de 2020, en plena pandemia, polo que o nome non podería ser máis axeitado. Os seus membros proveñen de grupos como Dandy Fever, Fred & the Perrys ou Impulsos Criminais, entre outros. Como consecuencia desta bagaxe diversa, o seu estilo pode definirse como punk rock, que en palabras do grupo é «o que nos une aos catro», mais, explican, o cuarteto enfoca a súa música «sen prexuizos, con influencias amplas» e «con certa tendencia ao son escuro».

«Boca abaixo», ademais do seu novo sinxelo, é o segundo videoclip do grupo. E, ao igual que o primeiro, titulado «Menceres» e lanzado en 2022, foi dirixido e montado pola viguesa Xandra Táboas. «Menceres» é un tema que fai parte do álbum homónimo do grupo. Seguro que máis cedo que tarde poderemos desfrutar da súa continuación en forma de EP.